La Herencia de Pachín de Melás.

Muerre Pilar Robles, memoria de la lliteratura asturiana La xixonesa, fía del escritor Pachín de Melás y hermana del pintor Germán Horacio, morrió esti xueves a los 102 años depués d'una vida defendiendo'l llegáu del padre Por Xaime Martínez 19 agosto 2023 Pachín de Melás y Agapita colos fíos: Germán Horacio (atrás), Enriqueta, Mercedes y Pilar. Recomendados Muerre Pilar Robles, memoria de la lliteratura asturiana 19 agosto 2023 Casa Narciso: la reinvención de la taberna 19 agosto 2023 Viuda: punk con castañueles 18 agosto 2023 La clase trabajadora asturiana ha perdido poder adquisitivo desde 2021, denuncia CCOO 18 agosto 2023 Xaime Martínez Xaime Martínez Ye filólogu, poeta, músicu y narrador en castellán y n’asturianu. El rellatu d’una vida siempre entama mal si lo fai allugando a la so protagonista namás como la fía, la musa, l’amante o la hermana de dalguién (un paisanu, obviamente): asina asocedía, por exemplu, cuando Elena Garro yera descrita na faxa d’una obra suya reeditada como «muyer d’Octavio Paz, amante de Bioy Casares, inspiradora de García Márquez y almiradora de Borges». El casu de Pilar Robles (Xixón, 1920-2023), por embargu, tien un aquel diferente, yá que bona parte del llabor d’esta xixonesa tuvo empobináu, amás d’a la so casa y a la crianza de los sos fíos, a la vindicación y recuperación de la obra del padre, l’escritor, republicanu federal y xovellanista Emilio Robles, más conocíu como «Pachín de Melás». Pachín de Melás y la muyer, Agapita, coles tres fíes: Mercedes, Pilar y Enriqueta. Pilar Robles nació na ciudá de Xixón cuando Pachín de Melás yá tenía’l quioscu pol que diba ser conocíu, na plaza del Seis d’Agostu, y cuando morrió’l pá en marcu de 1937, na cárcel d’El Coto, ella yera inda una adolescente. Según remembraba Pilar Robles nuna charra pol 75 aniversariu de la muerte del escritor en 2013, sicasí, les perres de la empresa familiar llevábales la so madre, Agapita. Pachín de Melás, nesti sentíu, foi un escritor mui representativu de la so dómina: nun foi quien a remanar les perres. Ello ye que, a pesar de que’l padre morrió cuando Pilar Robles yera mui nueva, la so obra y la so ideoloxía política marcaron a la familia nos años siguientes, como demuestren les vides de Pilar Robles y la del hermanu, l’ilustrador Germán Horacio. La producción lliteraria de Pachín de Melás, d’una mano, tuvo llugar nun contestu mui específicu, como s’estudió en 2011 cuando se-y dedicó el XXII Día de les Lletres Asturianes: foi entós que s’espublizaron un llibru sobre la so obra, Pachín de Melás y el rexonalismu asturianu, y el primer volume de la so obra completa, que veníen a sumase a la biografía que yá-y dedicara Patricio Adúriz en 1978, cuando se cumplíen 100 años del nacimientu del escritor. Ilustración de Germán Horacio Estos rellatos yá contaben lo esencial: el papel de Pachín de Melás na conformación d’una lliteratura popular escrita n’asturianu, con un fuerte raigañu nel contraste urbanu/rural: en bona midida, munchos de los tópicos del teatru costumista cristalizaron na so obra, y Emilio Robles foi un escritor en diálogu colos artistes contemporáneos y, sobre manera, col públicu. Sicasí, nestes visiones de la vida de Pachín de Melás faltaba, seique, una pieza esencial que recuperó David Guardado en Nunca vencida. Una historia de la idea d’Asturies (La Fabriquina, 2023): el so papel na política de Xixón nes primeres décades del sieglu XX. Ye bien conocida la so reivindicación del estatutu d’autonomía p’Asturies na Segunda República o’l rescate de los restos de Gaspar Melchor de Xovellanos cuando quemó la ilesia de San Pedro na Guerra Civil. Esti episodiu, que la so fía rellataba nel homenaxe de 2013, foi según Pilar Robles particularmente mal contáu polos historiadores posteriores, y ye ende que’l so testimoniu algama un valor especial: «Llevantóse de la cama. Fue derechu al Ayuntamientu, faló col que facía d’alcalde, que yera Avelino González Mallada. Díxo-y lo que pasaba, que yá taba la dinamita puesta na ilesia, y que si podía parase. Mallada dio la orde de que parasen, yá taben los mineros pa volala. Mio padre buscó testigos pa que nun dixeren, y lu sacó». Pachín de Melás lleendo’l 6 d’agostu de 1929, na plaza del Seis d’Agostu de Xixón. Al marxe d’estos episodios de los años postreros de la vida de Pachín de Melás, por embargu, la so afiliación y actividá política nun son conocíes dafechu. Como argumenta David Guardado, la so historia ye un exemplu perinteresante del «borráu de memoria, productu del devenir históricu» que ye frecuente n’Asturies, yá que «toles referencies qu’alcontramos a Emilio Robles en testos posteriores a la dictadura falen d’Emilio Robles como un escritor de militancia o simpatíes socialistes», pero en verdá les sos tendencies polítiques tuvieron muncho más cercanes al escaecíu republicanismu federalista asturianu de la dómina. De fechu, David Guardado espubliza en Nunca vencida un fragmentu d’un poema desconocíu hasta agora de Pachín de Melás, escritu n’homenaxe al tamién federalista Pi i Margall en fecha tan temprana como 1902: Recuerdu aquel home, al sabiu famosu lluceru de cencía qu’al mundu allumó; recuerdu aquel vieyu, padre bondadosu que llenu de penes per siempre morrió. Tou esti contestu nun pudo facer otro que condicionar les idees y la vida de la fía, Pilar Robles, que tovía 75 años depués de la muerte de Pachín de Melás remembraba’l so encarcelamientu en 1937 ente llárimes (el poeta acabaría morriendo na cárcel d’El Coto d’una malura pulmonar) y que presenció, por exemplu, la quema del quioscu familiar por parte d’un supuestu falanxista. Tanto foi asina que Pilar Robles decidió, d’ente les trés hermanes, caltener l’arquivu del padre nel Paséu del Muru, onde vivió hasta cuasi los 100 años, p’acabar donándolu a la Casa Natal de Xovellanos. Ye gracies a esi arquivu que conocemos munches obres de Pachín de Melás, y l’actividá incesante de la fía nel Atenéu Obreru de la ciudá y el so interés na pintura testemuñen un perfil bien interesante. Cubierta de la obra La sosiega, preparáu por Germán Horacio. Asina, la so vida tuvo condicionada pola alcordanza del padre; pero, tamién, de xuru pola del hermanu mayor, el cartelista y pintor Germán Horacio, que tuvo exiliase en Méxicu —pasando per un campu de concentración francés— tres de collaborar col exércitu republicanu y col Conseyu Soberanu d’Asturies y Llión. La so obra gráfica cuntó con unos cartelos de propaganda bélica mui conocíos y espresivos, asina como con óleos, dibuxos, cubiertes de llibros y una serie de grabaos sobre l’horror de la guerra: Germán Horacio foi, inclusive, l’autor del diseñu de los famosos billetes del Conseyu Soberano, los «belarminos». En cualesquier casu, la trayectoria vital de Germán Horacio espeyó, en dalgún sentíu, la de Pilar Robles, y dio cuenta de les peculiaridaes d’una familia que dio forma a un Xixón heriede de les idees del meyor asturianismu y republicanismu federal. Con Pilar Robles marchó, poro, una idea de la ciudá y del país que seique yá nun existen. etiquetasasturianuConseyu Soberanu d´Asturies y Lliónfederalismugermán horaciooficialidápachín de melás Artículo anterior Casa Narciso: la reinvención de la taberna