Aida en el recuerdo...Justicia y reparación.

Aida de la Fuente, un crime en tres actos Aida, sicasí, nin tenía 16 años, nin nunca nun la nomaren ‘La Llibertaria’. Y hebo, tamién, quien supo tola verdá sobre la so muerte. Asocedió en San Pedro de los Arcos (Uviéu), onde esti domingu, a les 12.30 hores, se fae un homenax a la so figura Por Arantza Margolles 28 octubre 2023 'Collage' fechu con dellos titulares al rodiu de los crímenes de los contrarrevolucionarios n'Asturies baxo la cabecera d''El Heraldo de Madrid' Recomendados Miles de asturianos pagan el doble de lo que deberían por el gas, advierte la Unión de Consumidores 28 octubre 2023 “El sistema público debería creer más en la rehabilitación de las personas con problemas de salud mental” 28 octubre 2023 Aida de la Fuente, un crime en tres actos 28 octubre 2023 El cambio climático daña la cosecha de manzana asturiana: cae un 40% 28 octubre 2023 Arantza Margolles Arantza Margolles Es historiadora. El crime d‘Aida de la Fuente nació resueltu. Eso creíen. Ehí tá la semeya del asesín: ñariz gruesa, ceyes separtaes, boca pequeña, güeyos escuros que miren, llisgos, a la cámara del fotógrafu de la revista Estampa. El brazu esquierdu apoyáu na mesa de dalgún café uvieín y, nel mirar, la digaxez que bien llueu va denunciar Federica Montseny na espublización anarquista La revista blanca: esi home, que ye llexonariu y apellídase Torrecilla, afirma que a la puerta de la ilesia de San Pedro de los Arcos mató a una moza que llevaba por nomatu “La Llibertaria”, y namái se pena (un pocu) de facelo al recordar que yera guapa. Asina entama unu de los mitos fundacionales más fuertes de la Memoria Democrática n’Asturies. Pero esti ye solo l’entamu d’una hestoria onde nada, o casi nada, ye lo que paez ser. Actu primeru: la heroína. “Tu glayasti puñu enriba…” El nueve de payares de 1934, Federica Montseny prevía que la hestoria de “La Llibertaria” d’Uviéu, espublizada seis díes antes pola revista gráfica “Estampa” en base a les declaraciones del llexonariu Torrecilla, nun diba dir a más. “Asina va pasar tamién a la hestoria la heroína anónima”, aventuraba la pensadora. Equivocábase. La trama contenía demasiaos elementos mitificables como pa pasar desapercibida: según Estampa, el 13 d’ochobre de 1934, acabante llegar el Terciu de Regulares a Uviéu pa atayar l’intentu revolucionariu que prendía la llama de la capital dende diba una selmana, un llexonariu nomáu Torrecilla matara a una muyer a la que toos llamaben “La Llibertaria”. Guapa, armada con una ametralladora que nun duldaba n’usar, ya indomable. Afirmaba Torrecilla que, al quedase ensin munición y acogotada polos lexonarios, “La Llibertaria” entamárala a golpes escontra los homes “con una barra de fierro que llevaba na mano drecha”, baltiándolos pa, ceu, encañonalos con una pistola que se sacara del pechu. “Yo fui más rápidu en disparar la mía y cayó. Diba toa vistida de colloráu, y yera bien guapa. Dempués sentílo”. El llexonariu Torrecilla, qu’afirmó ser l’asesín d’Aida Lafuente na revista Estampa, en payares de 1934 Nun yera verdá. Non too. Naquel Uviéu de sangre y pólvora les noticies corríen deseguida y nun tardó en sabese que quien el so cuerpu xacía yá, xunto con otros revolucionarios, na fuesa común de San Pedro de los Arcos, tenía nome d’ópera. Aida, “qu’asina se llamaba”, yera una de les fíes de Gustavo de la Fuente, pintor de la empresa teatral Fernández Arango (que llevaba los teatros Campoamor, Toreno y Jovellanos) y de Jesusa Penaoos; de les más moces d’una prole bien grande de siete fíos criaos al calor d’una familia intelectual y marcáos pola militancia comunista del padre. Fueron ellos quienes confirmaron que la moza asesinada en San Pedro de los Arcos yera Aida de la Fuente. Pero con dos matices. Unu: que’l vistíu que llevaba, recuperáu por unos vecinos que desvistieron a la heroína al reconocela (pa dáselo darréu a so má), tenía más d’una decena de furacos causaos por otros tantos balazos. L’otru: qu’a Aida de la Fuente naide, nunca, la llamara “la Llibertaria”. Cartelu del Socorro Rojo Internacional (1937) Actu segundu: la neña. “Yeres una neña, Aida” Cuntólo’l periodista asturianu Francisco Caramés nun testu espublizáu’l 11 de xineru de 1936 n’El Heraldu de Madrid. Esa foi la primer vegada que’l nome d’Aida de la Fuente salió nos papeles. Naquel primer testu del mitu yá non tan anónimu, ellaboráu en base al testimoniu oral de la so hermana Maruja, dizse que la víctima de les enfurecides tropes del Terciu llideráu por Juan Yagüe yera “débil de complexón, animadísima pelos sos años, dieciséis, y pol so vocecina, que denotaba un temperamentu más que rebelde, místicu”. Poco que ver col muyerón que, supuestamente, entamárala a golpes con una barra de fierro, “como si tratara d’un llixeru barquillu de xeláu”, escontra los llexonarios. Na nueva versión de los fechos, Aida nun coyera “la metralla”, como diría, décades más tarde, el cantar, sinón qu’el so papel na Revolución afayávase más al que s’esperaba d’una muyer, cuasi neña cuanto más. “Saliera, como bien de más, a atender a los feríos d’unu y d’otru bandu”, aseguraba Maruja de la Fuente Penaos. “La so bondá y el so temperamentu puestu al sacrificiu llevábala a tolos llugares onde había que facer un bien”. Uviéu, 1934. Foi la primer vegada que camudó’l relatu, pero entá lu fadría munches más. Aida de la Fuente, yá neña caritativa, yá muyer plantada escontra la contrarrevolución, convirtióse en mitu. En mayu de 1936 propúnxose nomar al parque infantil que proyectaben construyir nel Campu de los Patos d’Uviéu col so nome , pero eso nunca nun asocedió. Torgóse la idega pol golpe d’estáu. Na guerra, tiempu en que la necesidá d’unidá llama al enclín a construyir mitos, nació la lleenda. Aida de la Fuente dio nome a batallones; compartió cartelu pola independencia y la llibertá d’España xunto a muyeres como Mariana Pineda o Agustina d’Aragón. Al perdese la batalla cabera, aquella “Llibertaria” anónima convirtiérase yá nel símbolu de la llucha antifacista por antonomasia d’Asturies, al tiempu de que la so hestoria diluyíase nuna mistificación que exacerbada entá más na Transición. “Que nun niegue esa xente / qu’estos dos pechos cortaos, / qu’estos brazos arrincaos / son Llibertaria Lafuente”, diría Rafael Alberti, recurriendo, dafechu por épica, a ún de los llugares comunes veceros de la memoria de la Guerra Civil. La estirpación de los pechos, la mutilación de lo femenín, humildación y tortura con muncha carga simbólica pero que, a lo menos nel casu de La Fuente, nun paez qu’asocediera enxamás. Actu terceru: ¿la verdá? Non solo la falta de la verdá xenera’l mitu. Ye, sobremanera, el creyer raspiala coles yemes de los deos pa perdela dempués. Cunten que tolo que-y pasó a Aida de la Fuente llegó a tar escritu. Que pudimos sabelo ensin mitu, ensin lleenda, ensin épica, solo cola verdá desnuda del bon periodista: Luis Sirval, trasunto de Luis de Higón. Yera valencianu, pero, ante les noticies de la Revolución n’Uviéu (o, meyor dicho, a la réplica a la mesma por parte de les autoridaes republicanes del tiempu, cola CEDA nel gobiernu), moviérase a la capital asturiana pa mandar informaciones dende la primer llínea de fueu a los periódicos pa los qu’escribía, El Heraldo o La Libertad ente ellos. Sirval tenía labia. Carisma. Ye posible que, mientres la so estancia n’Asturies, llegara a conocer al llexonariu Torrecilla, y, en concencia, paez claro que supo, muncho primero de que la noticia llegara a tolos rincones d’España, del asesinatu d’Aida de La Fuente. Ye periodista non solo el qu’atopa, sinón el que sabe ver ónde ta la noticia. Sirval súpolo. Indagó, aparentemente, sobre la muerte de la neña “Lafuente”, asina, ente comines. Porque otru de los mitos al redol del mitu de “La Llibertaria” foi la so edá. Fala’l Rexistru Civil: Aida de la Fuente Penaos ñació en Llión, na cai Catalinas, en 1915, non dempués. “Dieciséis años tinía” cuando se proclamó la República, pero nel 34 yá tenía los 19 cumplidos. Eso nun lo llegó a saber Sirval. Seique, foi lo únicu. El teniente del Terciu Dimitri Ivan Ivanoff, acusáu y condergáu pola muerte de Sirval y a quien el periodista apuntó como autor material de la muerte d’Aida de La Fuente. “Voi a saber tola verdá, y a escribila”, sentenciara Sirval de forma previa a la so partida. Fízolo, pero la pieza clave de la so investigación sobre la represión de la Revolución, aquella que falaba sobre la verdadera muerte d’Aida de la Fuente, nun llegó a ver la lluz. El 26 d’ochobre, un grupu de guardies d’Asaltu aprució nel hotel La Flora, onde taba hospedáu Sirval, quien primeramente tuviera falando de los sos descubrimientos sobro’l crime de “la Llibertaria” nun café de la ciudá. Asesináronlu al otru día. L’epílogu que nunca foi Nada nun hai más peligrosu que la palabra pa quien comete actos escontra la xusticia. De la muerte de Luis Sirval, asocedida’l 27 d’ochobre de 1934, pela tarde, sábese poco, pero valible: lo que pudo llograr, coles sos investigaciones, Félix Gordón Ordás, diputáu per Llión del Partíu Radical Socialista, y que terminó per llevar a xuiciu a Dimitri Ivan Ivanoff. Aquel teniente del Terciu d’orixe búlgaru, complexón fuerte y mirada fría yera, según tolos testigos, quien sacara a golpes de la so celda al periodista, hores dempués de arresalu. Acompañáben-y otros dos tenientes (Rafael Florit de Togores y Ramón Pando), pero foi Ivanoff quien disparó. Seis tiros, certeros, sobre’l cuerpu de Sirval, fusiláu a costa fecha en rondando polos mentideros d’Uviéu’l rumor de que’l periodista fuera a afayar tolos detalles de la muerte d’Aida de la Fuente. Luis Sirval Nel branu de 1935 empezó’l xuiciu pola muerte del periodista. Pando y Florit foron absueltos; a Ivanoff condergóse-y a mediu añu de cárcel (el fiscal pidiera 14) por homicidiu imprudente. Foren, según el tribunal, seis los disparos accidentales que’l búlgaru disparó sobre’l cuerpu de Sirval, engafáu en alcontrándose, na so maleta, un informe sobre lo qu’asocediera en San Pedro de los Arcos. Había, ente tolos papeles, unu.“Daída Peña”, ponía nos apuntes de Sirval, errata incluyida: referíase a Aida (de la Fuente) Penaos. “Daída Peña. 16 años”. Otru erru, nuevamente. Yá s’esplicó. “Daída Peña. 16 años. Fusilóla’l teniente Dimitri Ivan Ivanoff”. Eso poníen. Aida de la Fuente tenía, en realidá, 19 años. Pero hai quien diz que 16 yeren los furacos de bala que travesaben el so vistíu, mortaya que nunca nun aportó a selo; colloráu, según Torrecilla; memoria nuesa; la bandera que nunca nun bordó Mariana Pineda. Dieciséis feríes mortales pa la xestación d’una lleenda. etiquetas1934actualidad_cabeceraAida LafuenteOctubre 1934temes_cabecera Artículo anterior El cambio climático daña la cosecha de manzana asturiana: cae un 40% Artículo siguiente “El sistema público debería creer más en la rehabilitación de las personas con problemas de salud mental” Actualidad