Sobre Julín....

Xulio Ramos, el cantautor que pudo reinar Muerre a los 74 años l'artista Xulio Ramos, ún de los más interesantes del Nuevu Canciu Astur Por Xaime Martínez 6 agosto 2023 Recomendados Xulio Ramos, el cantautor que pudo reinar 6 agosto 2023 Diarios Prestosos III: “La vida está bien si no te rindes” 6 agosto 2023 Asturies en transporte público: Playa de San Martín, senda costera y romanticismo ferroviario 6 agosto 2023 Galería: Así fue el Tsunami Xixón 5 agosto 2023 Xaime Martínez Xaime Martínez Ye filólogu, poeta, músicu y narrador en castellán y n’asturianu. Cuando s’imaxina una historia del arte asturianu que tuvo a puntu de ser y nun foi, o meyor, del arte asturianu qu’entamó a apaecer pero nun topó les condiciones afayadices pa la so continuación, hai que pensar en Xulio Ramos, el so peculiar discu Esparabanes (1980) y el movimientu musical nomáu Nuevu Canciu Astur. Xulio, Julio o Julín Ramos, como lu llamaba la so familia, nació n’Uviéu en 1949 y morrió ayeri en Xixón, a causa d’un ictus, a los 74 años. La so trayectoria representa perbién la de la cultura asturiana de les últimes décades: depués d’estudiar na escuela de los Dominicos —nel que se dio a conocer como cantante— y facer parte de dellos grupos ovetenses («Los Ángeles» o «The Liders»), quedó en Madrid en volviendo de facer la mili n’África, con venti años, y diose a conocer cuando cantó en castellanu’l cantar «Amapolas y espigas». Esti tema, anque munches veces se cree escritu pol mesmu Ramos, foi en verdá la composición cola que s’anició nel mundu de la música l’estremeñu Pablo Guerrero, nel Festival de Benidorm de 1969, onde ganó’l premiu a la meyor lletra y el segundu meyor premiu en xeneral. Cola producción de Juan Carlos Calderón, Julio Ramos grabó una versión que lu fixo daqué conocíu nel mundu del pop español y que foi la otra cara del single «Hola, Hi, Hello». Na década de los 70, Xulio Ramos continuó una carrera na música en castellanu con dellos altibaxos y dende Madrid: cantó temes interesantes, que s’editaron en formatu single, como «El entierro del pastor», «Analía» o «Pueblo marinero», y qu’alcuerden a los Serrat o Víctor Manuel d’aquella dómina pola mestura de la pulsión folk y la producción setentera. A lo último, firmó pola discográfica Hispavox, cola que llanzó cantares de los que depués s’arrepentiría, como «No te dejan nacer» (1975), contrariu a l’albuertu, o «Pero mujer… solo conmigo» (1975), d’intención comercial. Portada del primer single de Ramos (1969) En 1979, por embargu, regresó p’Asturies: cuatro años primero yá contactara col movimientu del Nuevu Canciu Astur, que facía por llevar a la música n’asturianu les innovaciones que plantegaran los folkies norteamericanos, los cantautores españoles, la nueva trova cubana o la nova cançó catalana. Esti movimientu, encabezáu por Nuberu, xurdía al empar de les reivindicaciones asturianistes de Conceyu Bable, y presentárase nel conciertu de 1975 na Panerona del Muséu del Pueblu d’Asturies, con Carlos Rubiera, Avelino López y el mesmu Xulio Ramos. Ye nesti contestu, poro, onde s’ha entender la so obra más notable: el LP Esparabanes (Sociedad Fonográfica Asturiana), llanzáu en 1980. Una obra vanguardista que prentendía abrir la música n’asturianu al rock progresivu y que, por embargu, partía de ritmos y llíriques tradicionales: nél topamos versiones bien interesantes de tonaes vaqueres («Los vaqueiros van-se, van-se», adaptada por Carlos Rubiera, Óscar Robledo y el mesmu Ramos), musicalizaciones de poemes («El Segaor», escrita por Alfonso Camín; o «Pa un xilgueru», de Bernardo Guardado, entrambes les dos musicaes por Ramos) y composiciones propies del propiu músicu uvieín («Güei llámelu Don José», «Dende que morrió el raposu»). Na producción d’esti discu rescamplen una ambición y una concepción complexa de la música asturiana que nun son nada avezaes nel entornu musical del país, y cuenta con unos músicos que representen lo meyor de la escena: el guitarrista Óscar Robledo, el batería Armando Terente «El Belga» (Modas Clandestinas, Stukas); los teclistes Josechu Atela y Berto «Turulla» (Cuélebre), el baxu Ángel Morán o’l saxofonista Andrés Puente García (Modas Clandestinas, Cuélebre). De la mesma manera, esti foi ún de los primeros discos grabaos n’asturianu con intención normalizadora, que facía por refugar castellanismos o usos amestaos de la llingua, y que facía usu de temes que tresllombaben los qu’hasta esi momentu caracterizaran a la música asturiana (lo rural, el costumismu, etc.). El tiempu, por embargu, pasó y obligó a Xulio Ramos a dedicase a otros llabores acullá de la música —lo cual, sicasí, tamién-y permitieron nun facer más encargos alimenticios, como aquellos d’Hispavox—. El mundu de la cultura asturiana nun tenía, igual que nun lu tien agora, un espaciu que permitiere la profesionalización de figures como la de Xulio. Ello tien tamién consecuencies que nun son negatives dafechu: nos años siguientes, Xulio Ramos amestó al so trabayu musical otres ocupaciones, y rellacionóse con figures como la d’Andrés Solar. En 2005, de fechu, editaría l’últimu discu que se-y conoz a Ramos —aparte de la reedición del 2014 d’Esparabanes—: Solar d’amor y arume verde. Esti discu yera una cantata n’homenaxe a Solar, embaxo la dirección de Carlos José Martínez, que se llanzó nel Día de les Lletres Asturianes. A lo último, según paez, púnxo-y música a dellos poemes del mierense José Luis Argüelles, masque nun tengo constancia de qu’estos temes s’espublizaren. Portada del discu «Solar d’amor y arume verde» (2005) Güei celebróse en Xixón un actu n’homenaxe al fináu Xulio Ramos nel que participó muncha xente del mundu de la política xixonesa, pues l’autor d’Esparabanes foi un miembru mui activu del PSOE llocal dende que comenzó a militar na so etapa madrileña. Sicasí, quiciabes la so figura nun tien el pesu que merez na historia de la música asturiana y n’asturianu: como pasa davezu nes histories trunques y estrañes de les cultures minorizaes, los que la formen son como samuráis (Bolaño dixit) que salen a lluchar contra un monstruu sabiendo previamente que van ser derrotaos. Xulio Ramos, de xuru, tento de facelo. etiquetasactualidad_cabeceraasturianucabeceracarlos rubierakultur_cabeceramúsica asturianaoficialidáPSOEXixón