Bande, ese artistazo arrinconado...RECOMENDADO.

Nortes | Centraes na periferia ActualidáTemesCulturesMemoriaOpiniónGaleríesXenteHazte socia de Nortes ActualidáDestacaesTemes “Asturies tien ensin construyir el relatu del so tiempu revolucionariu” Ramón Lluis Bande presenta esti martes con NORTES la so película "Retaguardia" nos Cines Embaxaores Foncalada. Por Diego Díaz Alonso 12 mayo 2025 Ramón Lluís Bande. Semeya: Alisa Guerrero Recomendados Diego Díaz Alonso Diego Díaz Alonso Historiador y activista social. Escribió en La Nueva España, Les Noticies, Diagonal y Atlántica XXII. Colabora en El Salto y dirige Nortes. Convocada huelga en la educación infantil y primaria 13 mayo 2025 “Les Escuelines” al borde de la huelga 13 mayo 2025 César Maltrago colabora con Nacho Vegas en el tema “Tergal” 13 mayo 2025 Somos Asturies se rodea de Bildu y Comunes para su segundo acto público 12 mayo 2025 L’escritor Ramón Lluis Bande (Xixón, 1972) entamó en 1999 a rodar cine y dende’l 2000 centró’l gran parte de la so dilatada producción en trés momentos clave de la historia asturiana del sieglu XX: la Revolución d’Ochobre de 1934, la Guerra d’España y la llucha antifranquista. Cultivador d’un estilu pausáu y poéticu, contrariu a la espectacularidá, los sos dos últimos llargumetraxes, Cantares de una revolución (2018) y Vaca mugiendo entre ruinas (2020), tuvieron una difusión importante pa tratase de películes de non ficción, mui alloñaes de los parámetros del cine mayoritariu. En Retaguardia (2024), el so últimu filme, que esti martes proyéctase a les 20h en Cines Foncalada, Uviéu, con NORTES, vuelve a la Guerra d’España y a les imáxenes del fotógrafu xixonés Constantino Suárez pa imaxinar, apoyáu nos testos del diariu socialista Avance, delles películes de propaganda posibles realizaes pol Frente Popular asturianu ente los años 1936 y 1937. Con narración de Federico Volpini y música de Sara Muñíz, Bande cuenta nuna sucesión de noticiarios la vida cotidiana de la población xixonesa baxo los bombardeos de l’aviación nazi, el control obreru de les fábriques pola UXT y la CNT, la colectivización de la industria pesquera o la ocupación de les tierres abandonaes polos propietarios afines al bandu golpista. La película tuvo la so estrena nel pasáu Festival Internacional de Cine de Xixón y va acompañada, como ye vezu de la casa, d’un llibru col guion, imáxenes y reflexones teóriques del autor: Cuaderno de Retaguardia (Pez de Plata, 2024). ¿Cómo surde la idea de construyir cuasi 90 años dempués esti cine de propaganda asturianu que nun pudo ser? Mientres el procesu de preparación de la mio película anterior, Vaca mugiendo entre ruinas, fui alcontrando munches evidencies de la presencia del cine na retaguardia asturiana y llamábame l’atención que nenguna d’aquelles imáxenes en movimientu llegare a los nuestros díes, nin siquiera conocemos nada del material que’l cineasta soviéticu Roman Karmen rodó na so estancia n’Asturies… Paecióme un retu (re)construyir y (re)imaxinar aquella cinematografía en potencia, que me permitía, amás, afondar nuna reflexón sobre la imaxe política y la política de la imaxe, al tiempu que siguía construyendo un imaxinariu nacional d’aquel momentu de la historia de les clases populares asturianes. Lleves años reivindicando esi Frente Tipográficu y esi Frente d’Arte que componíen los periodistes del diariu Avance y los artistes asturianos venceyaos al Frente Popular. Interésame muncho traer al presente (crear) una xenealoxía d’artistes que nun renunciaron al rigor y la búsqueda de la escelencia nel so trabayu, que poníen al serviciu de la llucha contra l’agresión fascista y en defensa de los intereses de les clases populares. Son nomes como los de los periodistes Javier Bueno, Juan Antonio Cabezas, Ovidio Gondi o José Manuel Vega Pico y artistes como Germán Horacio, Goico-Aguirre, Mariano Moré, Nicanor Piñole, Marola o Evaristo Valle, ente otros, qu’ayudaron a construyir un nosotros y, en cierta manera, l’imaxinariu de lo que fuimos / somos. La mayoría d’ellos pertenecíen a families acomodaes, pequeñoburgueses, y tuvieron accesu a formación y unes condiciones de vida que-yos permitíen aprovechala, pero dende’l primer momentu aceptaron que la hexemonía na llucha correspondía-y a la clas obrera —y les sos espresiones polítiques y sindicales— y punxéronse al so serviciu. Imagen de Constantino Suárez en “Retaguardia”. ¿A quién te prestaría conocer personalmente d’esi frente? Encantaríame tener participao en dalguna d’aquelles tertulies nocturnes que se celebraben na redacción d’Avance onde participaben munchos d’ellos. Llama l’atención el contraste ente l’atención al 34 cuando en realidá dos años dempués, nel 36, hai una revolución más fonda na retaguardia asturiana. N’Asturies tenemos tovía ensin construyir el relatu d’esi tiempu revolucionariu que va, polo menos, dende ochobre de 1934 hasta ochobre de 1937. Un momentu d’una importancia grande na construcción del movimientu obreru asturianu como suxetu políticu hexemónicu del país. Quédanos muncho que reconstruyir, estudiar y entender pa poder da-y un futuru a aquel pasáu. “Quédanos muncho que reconstruyir, estudiar y entender pa poder da-y un futuru a aquel pasáu” ¿Qué tien de singular la retaguardia asturiana? Como reivindicaben Javier Bueno y Ovidio Gondi, pue considerásela una retaguardia modélica en munchos aspectos. Anque esistía la Quinta Columna nunca foi un problema seriu pa la resistencia contra l’agresión. Siento a veces que la represión eclipsa munches veces lo más interesante de los años 30, que ye too lo que la clas obrera consiguió construyir a nivel políticu, económicu, social y cultural… Queda muncho relatu que construyir d’aquel tiempu nel que, como dices, lo más interesante dende’l presente —y pal futuru— tien que ver coles tresformaciones de la realidá cultural, política, económica y social. Ramón Lluis Bande. Semeya: Alisa Guerrero ¿Cómo tendría d’integrase la represión protagonizada polos antifascistes nun relatu democráticu de la Guerra d’España? Anque siempres esisten acciones incontrolaes, nun foi Asturies un territoriu onde esistiera una represión mui reseñable nin cruenta. Les autoridaes republicanes intentaben siguir manteniendo en pie cierta idea de la xusticia al traviés de los tribunales populares, acción que tamién s’estendía, por exemplu, a la protección del patrimoniu históricu y cultural. Creo que mientres el tiempu de la guerra siguía en pie, como idea rectora, aquella frase de Belarmino Tomás na revolución del 34 que pidía siguir siendo “humanos ente les fieres”. ¿Nun pue convertise la memoria histórica n’otra forma d’escapismu? Como cineasta, ufiértame un camín d’esploración formal infinitu y de reflexón sobre’l propiu llinguaxe cinematográficu en relación cola realidá, la historia, l’arte y la política. Como ciudadanu, recuperar una historia que nos arrebataron —como clas y como pueblu— paezme una necesidá pa poder pensar políticamente la construcción de futuros diferentes. El cronocidio que supunxo la Transición déxanos a los pies de los caballos delantre de la nueva y imparable fola reaccionaria. Na última edición del FICX presentóse en sección oficial otra película asturiana con la Guerra d’España como tema y tamién coles fotos de Constantino Suárez. ¿Cómo dialoguen Retaguardia y Luna? Creo que les dos películes representen bien la corriente hexemónica del cine asturianu de los últimos años, onde podemos alcontrar otros nomes propios como Elisa Cepedal, Tito Montero o Celia Viada Caso. Un cine non reconciliáu —nin no político nin no estético— qu’afonda en dalgunos resquiebros del nuestru pasáu políticu, desarrollando dispositivos cinematográficos d’un rigor y un interés grande —conectando dende la retaguardia con toles vanguardies— que constrúin un espaciu intelectual y políticu de señardá disidente, disensual, que nos ayude a pensar futuros posibles p’aquel pasáu obturáu.